Mostert
sal 25 jaar sit oor moorde
LLEWELLYN
PRINCE 12/02/2005 04:45 - (SA)
KAAPSTAD. - Ferdinandt Mostert (47) sal minstens 25 jaar tronkstraf
moet uitdien vir die moorde op die Nederlandse uitruilstudent me. Marleen
Konings én 'n voormalige tronkmaat van hom.
Mostert is gister deur regter Dennis van
Reenen in die hooggeregshof hier tot lewenslank en 'n bykomende 81 jaar
tronkstraf gevonnis. Hy is Donderdag op 22 van 23 aanklagte teen hom skuldig
bevind.
"Jy
is 'n mens teen wie die samelewing beskerm moet word. Die enigste manier is
om jou vir baie lank daaruit te verwyder," het Van Reenen aan 'n
emosionele Mostert, wat oorspronklik van Polokwane is, gesê. Van
Reenen het gesê die moord op Konings was vooraf beplan en dat Mostert in
haar én Michael John Victor se geval leuens aan hul naasbestaandes vertel
het om hul moorde weg te steek. Hy het
ontken hy het Konings in Desember 2003 in die Tradouwpas, en vir Victor in
April 1997 naby die Hartbeesboortdam vermoor.
"Jy
het 'n oormatige lys van vorige veroordelings en is opgeskorte vonnisse van
32 jaar vir sommige daarvan opgelê," het Van Reenen gesê. Mostert
is lewenslank vir die moord op Konings en 15 jaar vir die roof van haar
besittings opgelê. Hy is verder 20 jaar tronkstraf vir die moord op Victor
opgelê. Die res van sy vonnis is opgelê vir verskeie aanklagte wat bedrog,
diefstal en die onwettige besit van vuurwapens en ammunisie insluit. Die
vonnis sal gesamentlik uitgedien word, "wat beteken dat jy mintens 25
jaar sal uitdien en 'n ou man sal wees indien jy vrygelaat word."
Van Reenen het kapt. Piet Viljoen, die
ondersoekbeampte, en adv. Jan Theron, vir die staat, bedank vir hul deeglike
hantering van die saak. Mostert het voor
sy vonnis emosioneel aan die hof gesê Konings se gesin het hom skuldig
bevind reeds vóór die regter kon. "Ek voel nietemin jammer oor hul
verlies. Hulle het iets kosbaars verloor. Ek kan hulle nie blameer vir hul
gevoelens teenoor my nie." Volgens
hom was Victor "geen engeltjie nie. Ek het my bes probeer om hom te
help en vandag is ek skuldig aan sy moord". Mostert
het gesê hy het nog sy waardigheid en respek en sal in die tronk voortgaan
om mense rekenaaropleiding te gee. "Ek
het al 100 gevangenes suksesvol opgelei en nie een het weer na die tronk
teruggekeer nie," het hy gesê.
Marleen
se pa pleit man moet nooit vrygelaat word
Edna Isaacs en Llewellyn Prince 11/02/2005
00:04 - (SA)
KAAPSTAD.
-
"Verwyder hom asseblief uit die samelewing en laat hy vir die res van
sy lewe in die tronk sit."
Dít was gister die pleidooi van mnr. Edwin Konings, pa van die vermoorde
Nederlandse student me. Marleen Konings, in die hooggeregshof hier nadat
die man wat weens haar dood aangekla is, daaraan skuldig bevind is.
Regter Dennis van Reenen het Ferdinandt Mostert (47) ook daaraan skuldig
bevind dat hy me. Konings se besittings tydens die moord in Desember 2003
geroof het.
Mnr. Konings, wat saam met sy vrou en ander dogter ter verswaring van
vonnis getuig het, het gesê: "Net die gedagte dat hy (Mostert) dalk
dieselfde misdade in die toekoms kan pleeg, is ondraaglik. U (Van Reenen)
sal oor die gepaste vonnis besluit en sodoende geregtigheid in die
Suid-Afrikaanse regstelsel laat seëvier."
Sy vrou en me. Konings se ma, mev. Jose Konings, het in trane gesê:
"As jou kind doodgaan, gaan iets in jouself ook dood. 'n Deel van jou
identiteit word uitmekaar geskeur en dit veroorsaak 'n leemte.
"Geen verlies in die wêreld is wreder as om gedwing te word om
sonder jou kind te lewe nie. Ons kon haar nie eens op 'n beskaafde manier
groet nie. Om háár te groet, was nie vir ons bedoel nie. Ons mis haar.
Daar is nog soveel vrae."
Me. Konings se jonger suster, Lotte, het gesê: "Sy (Marleen) het
altyd twee keer gedink voor sy iets doen. Haar enigste fout was dat sy 'n
man vertrou het wat kwade bedoelings met haar gehad het.
"Ek blameer haar nie, want Mostert het baie mense mislei wat hom
vertrou het. Ek sou hom ook vir 'n goeie mens aangesien het."
Mostert het besluit om niks aan die gesin te sê nie.
